வேலை செய்யும் இடங்களில் ஏற்படும் பாலியல் தொல்லைகள் ~ Tamil News

பாலியல் தொல்லை என்பது மிகவும் மோசமான, மனிதாபிமானமற்ற, கீழ்த்தரமான ஒரு செயல். பாதிக்கப்படுபவர் ஆணாக இருந்தாலும் சரி, பெண்ணாக இருந்தாலும் சரி நியாயம் ஒன்றுதான்.

ஆனால் செய்தித்தாள், தொலைக்காட்சி, சினிமா, இணையம் என பல்வேறு ஊடகங்கள் மூலம் அடிக்கடி நம் கவனத்துக்கு வரும் பாலியல் தொல்லை குறித்த பெரும்பாலான செய்திகள், பொதுவிடங்களிலும் பணியிடங்களிலும் பெண்களுக்கு ஏற்படும் பாலியல் தொல்லை குறித்த செய்திகளாகவே இருக்கின்றன.

இப்படிச்சொன்னவுடனேயே சிலர், பெண்ணியம்-ஆணாதிக்கம் பேசுகிறான் என்று வரிந்துகட்டிக்கொண்டு சண்டையிட வந்துவிடுவார்கள் அவரவர் பக்கத்து நியாயங்கள், குற்றச்சாட்டுகள் மற்றும் கருத்துகளை எடுத்துக்கொண்டு! ஆனால், பெண்ணியம் குறித்து பெருமையாக பேசுவதோ, ஆணாதிக்கம் குறித்து இழிவாக பேசுவதோ, எது நியாயம், எது அநியாயம் என்று விவாதிப்பதோ அல்ல இக்கட்டுரையின் நோக்கம்!

மாறாக, இதுவரை நாம் ஊடகங்களின்மூலம், அங்கொன்றும் இங்கொன்றுமாய் நடந்ததாய் கேள்விப்பட்டு/பார்த்து விவாதித்த பாலியல் தொல்லைகளின் பின்புலத்தை, திட்டமிடப்பட்ட ஆய்வு ஒன்றின்மூலம் உற்று நோக்கி, ஆராய்ந்தபின் இப்பிரச்சினை குறித்து முன்வைக்கப்படும் சில கருத்துக்களையே இனிவரும் பகுதியில் வாசிக்க இருக்கிறோம்!

பாலியல் தொல்லை; என்ன, எங்கு நிகழ்கிறது?

நம் சமுதாயத்தில் பொதுவிடங்களுக்கு அடுத்தபடியாக, பணியிடங்களிலேயே அதிகம் அரங்கேறுகிறது பாலியல் தொல்லை. தங்களுக்கு ஏற்படும் செக்ஸ் தேவைகளை பூர்த்தி செய்துகொள்ள, இழிவுபடுத்தும், துன்பப்படுத்தும் நோக்கத்துடன் ஒரு பெண்ணை, பேச்சு மற்றும் பேச்சு தவிர்த்த பல்வேறு செயல்பாடுகளுடன் அணுகுவது பாலியல் தொல்லை என்று கருதப்படுகிறது.

அமெரிக்காவின் மிஷ்ஷிகன் பல்கலைக்கழக ஆய்வாளர்களான எமிலி லெஸ்கினென், லிலியா கார்டினா, மற்றும் டானா கபத் ஆகியோரின் கூற்றுப்படி, பாலியல் தொல்லையானது ஒருவரை தனிமனித அளவிலும், பணியளவிலும் மோசமாக பாதிக்கிறதாம். மேலும் இத்தகைய பாலியல் தொல்லையானது, பாலின வேற்றுமை கற்பிப்பதிலேயே மிகவும் மோசமானது என்றும் கருத்தப்படுகிறது. அதனால், தற்போதைய சட்டத்தில் பாலியல் தொல்லையை பாலின வேற்றுமை கற்ப்பிப்பதற்க்கு கீழ் வகைப்படுத்தப்படுகிறது என்கிறார்கள் எமிலி உள்ளடக்கிய ஆய்வுக்குழுவினர்.

ஆனால், பொதுவாக பாலியல் தொல்லையென்பது, ‘தேவையற்ற செக்ஸ் கவனத்தை’ உள்ளடக்கிய ஒன்றாகவே பாவிக்கப்படுகிறது. மேலும், எமிலி அவர்களின் ஆய்வில் பங்குகொண்ட பெண்களில், பாலியல் தொல்லைகளுக்கு உட்படுத்தப்படும் பத்தில் ஒன்பது பேர், ‘செக்ஸ் தேவைகள் இல்லாத’ வகையான பாலியல் தொல்லைகளுக்கு ஆளாகியிருக்கின்றனர் என்பது தெரியவந்தது. ஆனால், துரதிஷ்டவசமாக செக்ஸ் தேவைகள் சம்பந்தப்படாத எந்தவொரு பாலியல் தொல்லையும், பாலியல் தொல்லையாக கணக்கிலெடுத்துக்கொள்ளப்படாமல், சட்டத்தால் நிராகரிக்கப்படுகிறது என்பதே நிதர்சனம் என்கிறார் எமிலி!

ராணுவத்தில் பாலியல் தொல்லையும், சில பின்விளைவுகளும்!

ஆண்களால் பெரிதும் கட்டுப்படுத்தப்படும் துறைகளான, அமெரிக்க ராணுவம் (9,725 பெண்கள்) மற்றும் ஃபெடரல் சட்டப் பயிற்சி (1,425 பெண்கள்) ஆகிய துறைகளின்கீழ் பணிபுரியும் மொத்தம் 11,150 பெண்களுக்கு ஏற்பட்ட பாலியல் தொல்லை அனுபவங்களை சேகரித்து ஆய்வு செய்த மூவர் அடங்கிய எமிலியின் ஆய்வுக்குழுவினர், பெண்களால் அனுபவிக்கப்பட்ட பாலியல் தொல்லைகளை மொத்தம் 5 பிரத்தியேகமான பாலியல் தொல்லைகளாக வகைப்படுத்தினர்! அவை பின்வருமாறு,

குறைந்த அளவு பாலின ஏற்றத்தாழ்வு பாராட்டும் செயல்கள்

பாலியல் தொல்லைகள் (பாலின ஏற்றத்தாழ்வு மற்றும் மூர்க்கத்தனமான செயல்கள்)

தேவையற்ற பாலின கவனத்துடன் கூடிய பாலியல் தொல்லைகள்

மிதமான பாலியல் தொல்லைகள் (மிதமான அளவில் நிகழும் பாலியல் துன்புறுத்தல்கள்)

மோசமான பாலியல் தொல்லைகள் (அடிக்கடி பாலியல் துண்பங்களுக்கு உள்ளாக்கப்படுவது)

ஆய்வில் பங்குகொண்ட பெண்களில், சுமார் 90 விழுக்காட்டினர் மேற்குறிப்பிடப்பட்டுள்ள முதல் இரண்டு வகையான பாலியல் தொல்லைகளுக்கே ஆளாயினர் என்றும், இவ்வகையான பாலியல் தொல்லைகளில் தேவையற்ற செக்ஸ் தேவைகளை பூர்த்தி செய்யுமாறு பெண்கள் வற்புறுத்தப்படவில்லை என்றபோதும், பெரும்பாலும் நிகழும் பாலியல் தொல்லைகள் இவ்வகையானவையே என்றும் கண்டறியப்பட்டுள்ளது என்பது குறிப்பிடத்தக்கது!

பாலியல் தொல்லைகளுக்கு ஆளாகாத பெண்களுடன் ஒப்பிடுகையில், பாலியல் தொல்லைகளை அனுபவித்த பெண்கள் தனிமனித மற்றும் பணியளவில் பல இழப்புகளையும், கசப்பான நிகழ்வுகளையும் சந்தித்திருக்கிறார்கள் என்று தெரியவருகிறது!

ராணுவத்தில் பணிபுரியும் பெண்கள், அங்கு தங்களுக்கு ஏற்பட்ட பாலியல் தொல்லைகளினால் உடல் மற்றும் மன நலம் பாதிக்கப்பட்டு, தத்தம் பணிகளில் சிறப்பாக செயல்பட முடியாமல், பணிகளின்மீது ஒருவித வெறுப்பு ஏற்பட்டதாக தெரிவித்துள்ளனர். மேலும், உளவியல் ரீதியிலான ஆரோக்கியம் மற்றும் திருப்தி இல்லாததால், தங்கள் பணிகளிலிருந்து நிரந்தரமாக வெளியேற வேண்டுமென்ற எண்ணங்கள் தோன்றியதாகவும், பணி தொடர்பான மன அழுத்தத்துக்கும் ஆளாகியதாக தெரிவித்தனர் என்றும் தெரியவருகிறது!

இந்த ஆய்வு முன்வைக்கும் கருத்தாவது: செக்ஸ் தேவைகளை பூர்த்தி செய்யுமாறு வற்புறுத்தப்படும் பெண்களைப்போலவே, செக்ஸ் தேவைகள் சம்பந்தப்படாத பாலியல் தொல்லைகளுக்கு ஆளாகும் பெண்களும், தத்தம் பணிகளில் சிறப்பாக செயல்படுவதற்க்கான மன மற்றும் உடல் ஆரோக்கியம் பாதிக்கப்பட்டு, பணியிடங்களில் சிறப்பாக செயல்படுவதில்லை என்றே தெரியவருகிறது!

“சாதிகள் இல்லையடி பாப்பா…..குலம் உயர்வு தாழ்வு சொலல் பாவம்” என்று பாடிய பாரதியார்,

“பாலின வேற்றுமைகள் இல்லையடா தம்பி…..பாலின உயர்வு தாழ்வு சொலல்,

பாலியல் தொல்லைகள் கொடுத்தல் மிக மிக பாவம்” என்றும் ஒரு பாட்டு பாடிவிட்டு போயிருக்கலாம்?!

அதைக்கேட்டாலாவது சம்பந்தப்பட்டவர்கள் திருந்துவார்களோ என்னவோ?

About Admin A.M. Thaha Naleem. Whatsapp / Tel: 0771100221

பட்டதாரி ஆசிரியரான நான் சுமார் 10 வருடங்களுக்கு மேலாக இணையத்தில் இவ்வாறு தளத்தினை உருவாக்கி தரவுகளை மற்றவர்கள் அறிந்து கொள்ளும் நோக்குடன் வழங்குவதுடன். எனக்குக் கிடைக்கும் சில மணித்தியாலங்களையும் இதனுடன் செலவு செய்கிறேன்..